அமெரிக்காவில் உள்ள விமான நிலையம் ஒன்றில் பாதுகாப்பை மீறி நுழைந்து அரை நிர்வாணமாக ரன்வேயில் ரகளை செய்து இளைஞரை போலீஸார் கைது செய்து பின்னர் விடுவித்துள்ளனர்.
அமெரிக்காவின் அட்லாண்டா நகரில் உள்ள சர்வதேச விமான நிலையம் மிகவும் பிசியான விமான நிலையமாக கருதப்படுகிறது. இந்த விமான நிலையத்திற்கு பல அடுக்கு பாதுகாப்பு போடப்பட்டுள்ளது.
ஆனால், இந்த பாதுகப்புகளையும் மீறி இளைஞர் ஒருவர் கம்பி வேலியை தாண்டி குதித்து ஓடுபாதைக்கு வந்துள்ளார். புறப்பட தயாராக இருந்த ஒரு விமானத்தை நெருங்கி, விமானத்தில் உள்ளவர்களிடம் ரகளையில் ஈடுபட்டுள்ளார்.
அதோடு விமானத்தின் அவசர கால கதவை திறக்கவும் முயன்றுள்ளார். அரை நிர்வாண கோலத்துடன் வாலிபர் ரகளையில் ஈடுப்பட்டதால் பயணிகள் அதிர்ச்சி அடைந்தனர்.
பின்னர் விமான காவல் அதிகாரிகளுக்கு தகவல் கொடுக்கப்பட்டு அந்த இலைஞர் கைது செய்யப்பட்டார். அந்த இளைஞரை விசாரித்த போது விமான நிலையத்தை ஒட்டி நடைபெறும் கட்டுமான பணி பகுதியில் இருந்து வேலியை தாண்டி குதித்து உள்ளே வந்தது தெரிந்தது. பின்னர் அந்த இளைஞர் ஜாமீனில் விடுவிக்கப்பட்டார்.
