அதிமுக கூட்டணியில் பாமக மற்றும் தேமுதிக ஆகிய இரு கட்சிகளும் இணைவது கிட்டத்தட்ட உறுதி செய்யப்பட்டு விட்டதாகவும் இந்த இரு கட்சிகளுக்கும் கொடுக்கும் தொகுதிகளின் எண்ணிக்கையும் முடிவு செய்யப்பட்டுள்ளதாகவும் கூறப்படுகிறது.
வரும் பாராளுமன்ற தேர்தலில் திமுக, அதிமுக மற்றும் பாஜக என மூன்று அணிகள் தனித்தனியாக போட்டியிடும் என்று எதிர்பார்க்கப்படும் நிலையில் பாமக, தேமுதிக உள்பட சில கட்சிகளை கூட்டணியில் இணைக்க அதிமுக மற்றும் பாஜக முயற்சித்து வருகிறது என்று செய்திகள் வெளியானது.
இந்த நிலையில் அதிமுக கூட்டணியில் பாமக இணைவது கிட்டத்தட்ட உறுதி செய்யப்பட்டு விட்டதாகவும் பாமகவுக்கு ஏழு தொகுதிகள் மற்றும் ஒரு ராஜ்யசபா தொகுதி தர அதிமுக ஒப்பு கொண்டுள்ளதாகவும் தகவல் வெளியாகி உள்ளது.
கடந்த முறை தர்மபுரி தொகுதியில் அதிமுக கூட்டணியில் போட்டியிட்ட அன்புமணி தோல்வி அடைந்தாலும் அவருக்கு ஒப்புக்கொண்டபடி ராஜ்யசபா தொகுதி கொடுத்ததால் பாமக, அதிமுக கூட்டணியிலே தொடர விருப்பம் தெரிவித்துள்ளது.
அதேபோல் தேமுதிகவுக்கு மூன்று தொகுதிகள் மற்றும் ஒரு ராஜ்யசபா தொகுதி என பேச்சுவார்த்தை முடிந்து விட்டதாகவும் இது குறித்த அதிகாரப்பூர்வ அறிவிப்பு விரைவில் வெளியாகும் என்றும் கூறப்படுகிறது.
இதனை அடுத்து பாஜக ஏமாற்றம் அடைந்து இருந்தாலும் மேலும் சில கட்சிகளை கூட்டணியில் இணைக்க தீவிர முயற்சி செய்து வருவதாக கூறப்படுகிறது.
