டெல்லி எய்ம்ஸ் மருத்துவமனையில் நோயாளிகளை பார்க்க பல்வேறு கட்டுப்பாடுகள் விதிக்கப்பட்டதால், தனது கர்ப்பிணி மனைவியை பார்க்க நபர் ஒருவர் மருத்துவமனைக்கு டாக்டர் வேடமிட்டு சென்றுள்ளார்.
டெல்லி எய்ம்ஸ் மருத்துவமனையில் நபர் ஒருவர் டாக்டர் கோட் அணிந்து திரிந்துள்ளார். அவரது நடவடிக்கைகளில் சந்தேகித்த போலீஸார், அவரை பிடித்து விசாரித்தனர். அந்த நபர் தான் ஒரு சீனியர் டாக்டர் என கூறியுள்ளார்.
இதனையடுத்து அந்த நபரிடம் போலீஸார் அடையாள அட்டையை கேட்டுள்ளனர். இதனால் பயந்துபோன அந்த நபர், தாம் டாக்டர் வேடமிட்டு வந்த உண்மையை ஒப்புக்கொண்டார்.
போலீஸார் அவரை கைது செய்து விசாரித்ததில், மருத்துவமனையில் அனுமதிக்கப்பட்டுள்ள தனது கர்ப்பிணி மனைவியை பார்க்க பல்வேறு கட்டுப்பாடுகள் விதிக்கப்பட்டதால், டாக்டர் வேடமிட்டு தனது மனைவியை பார்க்க முயற்சித்தபோது தான் மாட்டிக் கொண்டதாக தெரிவித்தார். அந்த நபரிடம் போலீஸார் தொடர்ந்து விசாரணை நடத்தி வருகின்றனர்.
